Apidra Solostar 100 TV/ml N5 şpris-qələm

APİDRA, dərialtına yeridilmək üçün məhlul

Apidra tərkibi

 Təsiredici maddə:    1 ml məhlulun tərkibində 3,49 mq insulin qlulizin (100 V insan insulininə  ekvivalentdir). Köməkçi maddələr:  metakrezol, trometamol, natrium xlorid, polisorbat, natrium hidroksid,  qatılaşdırılımış xlorid turşusu, inyeksiya üçün su.

İstifadəsinə göstərişlər:

 Böyüklər, yeniyetmələr və 6 yaşdan yuxarı uşaqlarda, insulinlə müalicəsi tələb olunan şəkərli diabet.

Əks göstərişlər:

 Təsiredici maddəyə və ya dərman maddəsinin tərkibinə daxil olan hər hansı köməkçi maddəyə qarşı yüksək həssaslıq.  Hipoqlikemiya.

Hamiləlik və laktasiya dövrü:

 Hamiləlik İnsulin qlulizinin hamilə qadınlarda istifadəsinə dair kifayət qədər məlumat mövcud deyil. İnsulin qlulizinin hamilə qadınlarda istifadəsinə dair mövcud olan məhdud məlumatlara (300 hamiləliyin nəticəsi haqqında məlumat verilmişdir) əsasən preparatın hamiləliyin gedişinə, dölə və yenidoğulmuşa mənfi təsiri aşkarlanmamışdır.  Reproduktivliyin qiymətləndirilməsinə dair aparılan preklinik tədqiqatlarda  hamiləliyə, embrional (fetal) inkişafa, doğuşa və doğuşdan sonrakı dövrdə inkişafa olan təsiri üzrə insulin qlulizin və insan insulini arasında fərq aşkarlanmamışdır (“Təhlükəsizliyin qiymətləndirilməsinə dair aparılan preklinik tədqiqatların nəticələri” bölməsinə bax).  Hamilə qadınlara preparatı təyin edərək ehtiyatlı olmaq lazımdır. Qlükozanın ciddi monitorinqinin aparılması zəruridir.  Anamnezdə şəkərli diabet və ya hestasion şəkərli diabet olan qadınlarda hamiləlik müddətində metabolik tarazlıq vəziyyəti saxlanılmalıdır. Hamiləliyin 1-ci trimestrində insulinə olan tələbat azala bilər, 2-ci və 3-cü trimestrlərdə isə, adətən, yüksəlir. Doğuşdan dərhal sonra insulinə olan tələbat sürətlə azalır.  Laktasiya dövrü İnsulinin ana südünə nüfuz etməsi məlum deyil, lakin, adətən, peroral qəbuldan sonra insulin ana südünə nüfuz etmir və sorulmur. Ana südü ilə qidalandıran qadınlarda insulinin dozasının tənzimlənməsi və pəhrizin saxlanılması tələb oluna bilər. 

Apidra istifadə qaydası, dozası

 Apidra qida qəbulundan 0-15 dəqiqə əvvəl və ya dərhal sonra yeridilməlidir.  Apidra orta- və ya uzunmüddətli təsirli insulini və ya bazal insulinin analoqunu (Lantus, insulin qlarqin) daxil edən rejimlərdə istifadə edilməlidir, onu tablet formasında olan hipoqlikemik preparatlar ilə yanaşı istifadə etmək olar.  Apidranın dozaları fərdi olaraq müəyyən edilir.  Dərman preparatının effektivliyi vahid ilə göstərilir. Həmin vahidlər Apidra üçün eksklüziv olub BV-ə və ya insulinin digər analoqlarının effektivliyini ifadə etmək üçün istifadə edilən vahidlərə bənzər deyil.  Yeridilmə Apidra qarın, çiyin və ya baldır nahiyəsinin dərialtı piy toxumasına, uzunmüddətli infuziya zamanı isə qarının dərialtı piy toxumasına yeridilir. Hər bir yeni inyeksiya zamanı inyeksiya və infuziya yerləri dəyişilməlidir. Sorulma sürəti və, müvafiq olaraq, təsirin yaranma vaxtı və müddəti inyeksiya yerindən, fiziki yüklənmədən və digər faktorlardan asılı ola bilər. Qarın boşluğunun divarına dərialtı yeridilmə zamanı digər yeridilmə üsulları ilə müqayisədə sorulmanın daha yüksək sürəti qeyd olunur (“Farmakokinetika” bölməsinə bax).  Preparatın damara düşməməsinə nəzarət etmək lazımdır. İnyeksiyadan sonra inyeksiya yerini ovuşdurmaq lazım deyil. Pasiyentə inyeksiyanın düzgün yeridilməsi qaydasını öyrətmək lazımdır. Kartriclərdə olan Apidra preparatı yalnız çoxdəfəli şpris-qələmlərin vasitəsi ilə dərialtı yeridilmə üçün nəzərdə tutulmuşdur. Sizə, digər üsul ilə nsulin inyeksiyasını və ya infuziyasını yerinə yetirmək lazım olduğu halda müalicə həkiminizə müraciət edin. SoloStar şpris-qələmi istifadə etməzdən əvvəl onun istifadəsinə dair təlimatı diqqət ilə oxumaq lazımdır. İnsulinlər ilə qarışdırılması Uyğunsuzluğa dair tədqiqatlar aparılmadığı üçün bu preparatı digər dərman preparatları (NPH insan insulini istisna olmaqla) ilə qarışdırmaq tövsiyə edilmir.  Xüsusi pasiyentlər qrupları Böyrək funksiyasının pozulması İnsulin qlulizinin farmakokinetik xüsusiyyətləri, adətən, böyrək funksiyasının pozulması olan pasiyentlərdə saxlanılır. Lakin böyrək funksiyasının pozulması zamanı insulinə olan tələbat azala bilər (“Farmakokinetika” bölməsinə bax).  Qaraciyər funksiyasının pozulması Qaraciyər funksiyasının pozulması olan pasiyentlərdə insulin qluzilinin farmakokinetik xüsusiyyətləri tədqiq edilməmişdir. Qaraciyər funksiyasının pozulması olan pasiyentlərdə qlükoneogenezin və insulinin metabolizminin zəifləməsi nəticəsində insulinə olan tələbat azalır.  Ahıl yaşlı pasiyentlər Şəkərli diabetdən əziyyət çəkən ahıl yaşlı pasiyentlərdə farmakokinetikaya dair məlumatlar məhduddur. Böyrək funksiyasının pozulması insulinə olan tələbatın azalması ilə nəticələnə bilər.  Uşaqlar və yeniyetmələr Apidra preparatının 6 yaşa qədər uşaqlara təyin edilməsinə dair klinik məlumatlar məhduddur.