Afobazol 10 mg N60 tb

Afobazol, tabletlər

Afobazol, beynəlxalq patentləşdirilməmiş adı: Fabomotizol

Afobazol tərkibi

Təsiredici maddə: 1 tabletin tərkibində 10 mq fabomotizol (fabomotizol dihidroxlorid şəklində) vardır.

İstifadəsinə göstərişlər

Afobazol böyüklərdə həyəcanlı vəziyyətlərdə: generalizə olunmuş həyəcan pozğunluqları, nevrasteniya, adaptasiya pozğunluqları, somatik xəstəliklər (bronxial astma, qıcıqlanmış bağırsaq sindromu, sistemli qırmızı qurdeşənəyi, ürəyin işemik xəstəliyi, hipertoniya, aritmiyalar), dermatoloji, onkoloji və digər xəstəliklər fonunda yaranan həyəcan hallarının aradan qaldırılması məqsədilə istifadə olunur. Həmçinin, yuxu pozğunluqları, neyrosirkulyator distoniya, predmenstrual sindrom, alkoqol abstinent sindromu və siqaretdən imtina zamanı "ləğvetmə" sindromunu yüngülləşdirmək üçün istifadə olunur.

Əks göstərişlər

Preparata qarşı fərdi dözümsüzlük, qalaktozaya qarşı dözümsüzlük, laktaza çatışmazlığı, qlükoza-qalaktoza malabsorbsiyası, hamiləlik, laktasiya dövrü və 18 yaşa qədər uşaqlarda istifadəsi əks göstərişdir.

Hamiləlik və laktasiya dövründə istifadəsi

Hamiləlik dövründə Afobazolun qəbulu əks göstərişdir. Laktasiya dövründə preparatın qəbuluna zərurət yarandıqda, döşlə əmizdirmə dayandırılmalıdır.

Pediatriyada istifadəsi

18 yaşa qədər uşaqlarda istifadəsi əks göstərişdir.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

Afobazol nəqliyyat vasitələrinin idarə olunmasına və yüksək diqqət və sürətli psixomotor reaksiya tələb edən fəaliyyət növlərinə mənfi təsir göstərmir.

Afobazol istifadə qaydası

Preparat yeməkdən sonra daxilə qəbul edilir. Optimal birdəfəlik doza 10 mq, gündəlik doza 30 mq (3 dəfə 10 mq) təşkil edir. Müalicə kursu adətən 2-4 həftə davam edir. Həkim göstərişi ilə gündəlik doza 60 mq-a qədər, müalicə müddəti isə 3 aya qədər artırıla bilər.