Tobradeks 1/3MG 3.5 g Məlhəm

Tobradeks, steril göz məlhəmi

Tobradeks tərkibi

Tobradeks tərkibi, 1 q məlhəmin tərkibində 3 mq tobramisin (0,3%), 1 mq deksametazon (0,1%) vardır. Köməkçi maddələr: susuz xlorbutanol, maye parafin, ağ yumşaq parafin.

Tobradeks, istifadəsinə göstərişlər

Tobradeks göz məlhəmi səthi bakterial okulyar infeksiya riski və ya okulyar bakterial infeksiya olduğu zaman, kortikosteroidlər təyin edilən steroid həssas iltihabi okulyar xəstəliklərdə təyin edilir. Okulyar steroidlər palpebral və bulbar konyunktivanın, buynuz qişa və göz almasının ön seqmentinin iltihabi xəstəliklərində, xronik ön üveit və buynuz qişanın zədələnməsi zamanı təyin edilir. İnfeksiya əleyhinə komponentlə preparatın kombinəolunmuş istifadəsi səthi okulyar infeksiya riski yüksək olduqda və ya gözdə bakteriyaların təhlükəli sayda olma ehtimalı olduqda təyin edilir.

Əks göstərişlər

• Preparatın təsiredici və ya köməkçi maddələrindən hər hansı birinə qarşı hiperhəssaslıq
• Herpes simplex tərəfindən törədilən keratit
• Buynuz qişanın və konyunktivanın inək suçiçəyi (vaccinia), suçiçəyi və digər virus xəstəlikləri
• Göz strukturunun göbələk xəstəlikləri və ya gözün müalicə olunmamış parazitar infeksiyası
• Mikobakterial okulyar infeksiyalar

Hamiləlik və laktasiya dövründə istifadəsi

Hamilə qadınlarda Tobradeks göz məlhəmi ilə əlaqədar adekvat və yaxşı nəzarət edilmiş tədqiqatlar aparılmadığı üçün, preparatla əlaqəli risklər barədə məlumat vermək mümkün deyil. Hamiləlik dövründə kortikosteroidlərin uzunmüddətli və ya təkrar istifadəsi bətndaxili inkişaf geriliyinin artması riski ilə əlaqələndirilmişdir. Heyvanlar üzərində aparılan tədqiqatlarda deksametazonun terapevtik dozalarda istifadəsi embrio-fetal toksiklik və teratogenlik göstərmişdir. Tobramisinlə müalicədən sonra döldə zərərli təsir müşahidə edilməmişdir. Yerli istifadədən sonra ana südünə keçib-keçmədiyi məlum deyil. Südəmər körpələr üçün risk istisna edilmir. Fertilliyə dair məlumatlar məhduddur, lakin tobramisin siçovullarda mənfi təsir göstərməmişdir.

Tobradeks, istifadə qaydası

Məlhəm gündə 3-4 dəfə konyunktival kisəciyə nazik zolaq şəklində (təxminən 1 sm) çəkilir. Məlhəm və suspenziya birlikdə də istifadə oluna bilər: məlhəm axşam, suspenziya gün ərzində. Böyrək və qaraciyər funksiyasının pozulması zamanı dozaya düzəliş tələb olunmur. 2 yaşdan yuxarı uşaqlarda böyüklər üçün dozada istifadə oluna bilər. Yaşlı xəstələrdə dozaya düzəlişə ehtiyac yoxdur. Preparat yalnız yerli istifadə üçündür. Tubun ucunun gözə toxunmaması və 5 dəqiqəlik fasilə ilə digər preparatların istifadəsi tövsiyə olunur. Məlhəm ən sonda tətbiq edilməlidir.